የልደታ ክፍለ ከተማ ወጣቶችና ስፖርት ጽሕፈት ቤት በክረምት በጎ ፈቃድ አገልግሎት የደም ልገሳ መርሐ-ግብር አካሄደ የልደታ ክፍለ ከተማ ወጣቶችና ስፖርት ጽሕፈት ቤት የ2018 ዓ.ም የክረምት በጎ ፈቃድ አገልግሎት ተግባራት አካል የሆነውን የደም ልገሳ ፕሮግራም አካሂዷል። "በጎነት ለክቡር የሰው ልጅ ሕይወት" በሚል መሪ ቃል በተከናወነው በዚህ መርሐ-ግብር ላይ የጽሕፈት ቤቱ አመራሮች፣ ሠራተኞችና የክፍለ ከተማው ወጣቶች ተገኝተው ደማቸውን ለግሰዋል። የጽሕፈት ቤቱ ኃላፊ አቶ ግዛው አለሙ በዚሁ ወቅት እንደገለጹት፤ የክረምት በጎ ፈቃድ አገልግሎት ወጣቱ ማኅበረሰብ ለአገሩና ለወገኑ ያለውን አጋርነትና ፍቅር የሚያሳይበት ትልቅ መድረክ ነው። ደም መለገስ ደግሞ ከአንድ በጎ ተግባር በላይ የአንድን ወገን ሕይወት ከሞት የመታደግ ታላቅ ሰብአዊ ኃላፊነት በመሆኑ፣ የክፍለ ከተማው ወጣቶች ለቀረበላቸው ጥሪ በሰጡት ፈጣን ምላሽ ደስታቸውን ገልጸዋል። በዕለቱ በፈቃደኝነት ደማቸውን የለገሱ ወጣቶች በሰጡት አስተያየት፣ በክረምት በጎ ፈቃድ መርሐ-ግብር ላይ በመሳተፍ ደም በመለገሳቸው ትልቅ የሕሊና እርካታ እንዳገኙ ጠቁመው፤ መሰል የበጎ አድራጎት ሥራዎች ተጠናክረው መቀጠል እንዳለባቸው አሳስበዋል። ጽሕፈት ቤቱ በክረምት ወቅት ካቀዳቸው ልዩ ልዩ የበጎ ፈቃድ አገልግሎቶች መካከል ይህ የደም ልገሳ መርሐ-ግብር አንዱና ዋነኛው ሲሆን፣ በቀጣይም ወጣቱን ያሳተፉ ልዩ ልዩ የማኅበረሰብ አቀፍ ልማትና የበጎ አድራጎት ሥራዎች ተጠናክረው እንደሚቀጥሉ ታውቋል።